`Müsəlman ölkəsinin bunu etməsi utancvericidir` - Ruhani
21:11 15 Noyabr 2017
“Livan kimi müstəqil bir ölkənin işinə açıq-aşkar müdaxilə etmək, kimisə istefa etməyə məcbur etmək və digərini onun yerinə təqdim etmək tarixdə görünməyən hadisələrdəndir”.
Femida.az APA-ya istinadən xəbər verir ki, bunu İran prezidenti Həsən Ruhani bu gün Nazirlər Kabinetinin iclasında Livan baş naziri Saad Həririnin istefasına münasibət bildirərkən deyib.
“Siz kimsiz və hansı gücə söykənərək belə addımlar atırsınız? Düşünürsünüzmü ki, pul hara kimi öz işini görə bilər? Regionda olan müsəlman ölkələrdən birinin sionist rejiminə yalvararaq Livan xalqını bombalamasını istəməsi utancvericidir”, - deyə o qeyd edib.
H. Ruhani deyib ki, ABŞ rəsmilərinin regiona səfərindən sonra bölgədə müharibə odu alovlanır. “Əcnəbi güclərin müdaxiləsi ilə İraq, Əfqanıstan və Suriyada böyük müharibələr baş verib. Yəmən darmadağın edilib. İnsanlıq göstərib Yəmən xalqını düşünən kimsə varmı? Yəmənin müdafiəsiz xalqı neçə illərdir xəstəlik, yoxsulluq, davamlı bombardman kimi problemlərlə üz-üzədir. Özünü Hərəmlərin xidmətçisi bilən müsəlman ölkəsi Yəmənin günahsız xalqına hansı səbəbdən təzyiq göstərir? Bu ölkə peşman da deyil və cinayətlərini hələ də davam etdirir”.
H. Ruhani qeyd edib ki, BMT bu cinayətlərin qarşısında susub, qətiyyətli mövqe sərgiləməyib: “İndiyədək bəziləri düşünürdü ki, böyük güclərin regionda iştirakı bölgədə təhlükəsizliyi təmin edəcək və sabitlik gətirəcək. Lakin bu gün hamı görür ki, xarici güclərin regionda mövcudluğunun bölgə üçün faydası yoxdur”.
İran prezidenti çıxışı zamanı İranın qərbində baş vermiş zəlzələ ilə bağlı edilmiş yardımlar haqqında danışıb. O bildirib ki, zəlzələ bölgəsində 30 min ev yenidən qurulmalıdır.
Femida.az
Oxunub: 1845
